SILVESTRE PEROS, SR., Bigbigen Dagiti Annakda ti Pateg, Ayat ken Pannuporta

[Nabulod ti ladawan a naaramat. Maysa a buya ti sakada a nagbagkat iti naputed nga unas]

SILVESTRE PEROS, SR., Bigbigen Dagiti Annakda ti Pateg, Ayat ken Pannuporta Kadakuada
ni Rudy Ram. Rumbaoa

"Kuna dagiti annakda: "Bigbigenmi ti kinapateg ti ayat ken pannuportada kadakami...""

KAAY-AYO nga awagan dagiti annakna a lallaki ken manugangna a babai iti "Tata." Wen, isu dayta ni Silvetre Peros, Sr.

Nayanak sakbay ti baro a tawen ni Silvestre idi Disiembre 31, 1916 idiay Santo Domingo, Ilocos Sure. Nayasawa ken dati Herminia Torricer, karrubana.
Narigat ti biag dagiti ag-Peros idi adda iti Filipinas. Mammanday laeng ti trabaho ni Silvestre a pangsuportana iti pamilia a supusopan iti bassit a mateggedan ni Herminia iti panaglakolakona iti kumporme dita.

Iti tawen 1945, simmangept dagiti pannakabagi ti sakada recruiter iti Filipinas tapno agawis kadagiti agtutubo ken napipigsa a lallaki nga agtrabaho iti plantasion ti kaunasan ken kapinyaan ti Hawaii. Ni Silvestre ti maysa kadagiti kagagasatan a lallaki a napili nga agtrabaho. Naragsak ni Silvestre iti dimteng a gasat ken opurtunidad kenkuana. Nagpirma ngarud iti kontrata uray no ti kasukat daytoy ket iti panangpanawna iti ubing nga asawa ken dagiti annakna- da Greg ken Nenita.

Nagrubbuat ti grupo ni Silvestre manipud iti Puerto ti Salomague, Ilocos Sur, idi Enero 1946. Naglugan dagitoy a lallaki iti barko nga S.S. Maunawili. Ti Hawaiian Commercial & Sugar Company ti nangisponsor ken ni Silvestre.

Apaman a nakasangpet ni Silvestre iti Maui, nangnaed daytoy iti Camp 13. Kinabbalayna dagiti sumagmamano a sakada. Nagtrabaho kas fertilizer maintenance man ken irrigation system maintenance man agingga a nagretiro iti serbisio idi tawen 1978.

Para ken ni Silvestre, naliday ti nagbalin a biagna iti kampo gapu iti nalaus unay nga iliwna iti pinanawanna a pamilia. Ngem saan a nagbayag, nagpa-Hawaii ti pamiliana idi Humio 1946.

Tawen 1950, narikna dagiti agasawa a Silvestre ken Heminia a narigat ti biag kadagidi a tiempo. Kunada a nasaysayaat met laeng ti Filipinas a pangpadakkelan dagiti annakda. Inyawid ngarud ni Silvestre ti sibubukel a pamiliana idiay Filipinas, kalpasanna, nagsubli iti Hawaii nga is-isuna.

Kadaydi a tiempo a panangyawid ni Silvestre ti pamiliana iti Filipinas, namnamaenda ken Herminia a maipasngay ti anakda iti Hawaii ngem saan. Uray iti kaaddada iti barko a naglugananda, ti ammo ni Silvestre no dita ti paganakan ti asawana. Ngem iti ilida a Santo Domingo ti nagpasngayan ni Herminia, Enero 3, 1951, iti maysa a nalungpo a maladaga, ket pinanagananda iti Silvestre, Jr.

Manipud ubbing agingga a dimmakkel dagiti annakda, ni Herminia ti nangtaripato kadakuada. Bayat met kadagidi a tiempo a panagdakkel dagiti ubbing, nagdesisionan da Silvetre ken Herminia a nasaysayaat met la nga agsubli ti sibubukel a pamiliana iti Hawaii tapno maimatangan ni Silvestre ti panagdakkelda ken maitedna ti umiso a kasapulanda. Kalpasan ngarud ti siam a tawen a panagiinnadayo ti pamilia, idi 1960, nagsubli ti sibubukel a pamilia iti Hawaii malaksid la ken Aurea ta naasawaan idin, ngem simmaruno met laeng a nagpa-Hawaii kalpasan ti sumagmamano a tawen a panagurayna.

Kalpasan a nakasubli ti sibubukel a Peros iti Hawaii, nagnaedda iti Kampo Kuatro. Ditoy a nakaipasngayan ti sabali pay nga anak ni Silvestre a lalaki idi Marso 19, 1962- ni Jesse. Ket manipud Kampo Kuatro, immakar ti pamilia iti Numero 6 Increment gapu ta manarimaan idin a rebrebbaen ti HC & S ti dati a kampo a nagyananda.

Naragsak ti Silvestre iti panagtitiponda nga agpapagayam iti old Kahului Shoppong Center. Ditoy a pangibusanda ti oras da iti panagay-ayam iti baraha, chekers ken hanafuda iti sirok ti kayo ti monkeypod ti nasao a center.

Kaay-ayo pay ni Silvestre ti agbuya iti "biangan" [wenno cockfight] a kaduana dagiti gagayyemna ta maysa pay daytoy a paborito a pangibusanda ti oras. Mammukis pay ni Silvestre ta isu a mismo ti mamukpukis iti buok dagiti gagayyemna.

Manangipateg ken managayat a nagannak da Silvestre ken Herminia. Manakitienda ni Herminia ta kanayon a mapan iti swap meet a bitbitna ti bay-ong a pangipananna kadagiti matiendaananna kas iti prutas, nateng, kappi wenno rasa ken lames. Kaa-ayo pay ni Herminia ti mangpasiar dagiti pagtaengan dagiti annakna a pangibusanna metten ti oras iti panangdalusna iti arubayan ken uneg ti balbalayda. Kuna ni Hermia a napintas a panangwatwat iti bagi ti panagdalusdalusna.

Naparaburan da Silvestre ken Herminia iti innem a community-minded ken church-oriented nga annak:
Ni Aurea Tagorda ti inauna. Nayasawa iti Dios-ti-aluadna Reynante tagorda. Maysa ni Aurea a retirado a medical records employee iti Hale Makua. Aktibo iti Filipino Community Clubs. Lima ti annakda: isu da Vic [Joanne], Gene, Leilani [Marcus] Badley, Robert [Mary Jane], Richard [Carolyn], ken 13 ti appokoda.

Ni Nenita ti maikadua. Retirado a cook iti Hale Makua ken nayasawa ken ni Rogelio Evanghelista, maysa a retirado nga empliado iti Hawaiian Telephone Company. Agpada da Nenita ken Rogelio nga aktibo iti Veterans Activities kasta met iti Filipino clubs ken iti Good Sheperd Church. Maysa ti anakda, ni Edward [Sannah], ken dua ti appokoda.

Maikato a bunga ni Greg. Retirado a Police Lieutenant ken nayasawa ken ni Petra Domingo, retirado iti Maui County Housing Specialist. Aktibo dagitoy nga agasawa iti Maui ken iti Statewide Filipino Clubs, kasta met iti Christ the King Church kas lector, Eucharistic Minister ken Baptism Preparation. Agpada nga ahente dagitoy iti Real Estate para iti Peros Realty. Tallo ti annakda: ni Gregory "Jay" [Lorelle], Peggy ken Pamela. Dua ti appokoda.

Ni James ti maikapat. Maysa a mailcarrier, nayasawa ken dati Prescilla Paet, maysa a nurse. Kaay-ayoda ti makipaset kadagiti aktibidad ti komunidad kas iti panagserbi iti simbaan, ti St. Anne ti Waihe'e. Dua dagiti annakda: Jason [Cecilia] ken Melissa. Dua ti appokoda.

Maikalima ti Dios-ti-aluadna Sylvester Jr., maysa a Realtor, nayasawa ken ni dati Lucy Cabalo, retirado a mangisursuro. Aktibo da Sylvester ken Lucy kadagiti Filipino Community Clubs, MEO, kasta met iti simbaan mainaig iti kina-ministro ti Christ the King Church, iti Finance, Baptism Preparation ken Grief Support Ministry. Ni Sylvester Jr., ti agtagikua iti Peros Realty Company. Dua ti annakda: da Lianne [Mike] Peros-Busch ken Sherman Luke.

Ni Jesse ti inaudi, maysa nga Horizon Air System Analyst, nayasawa ken ni Anne Setera, maysa nga Application Specialist for Financial Aid iti Clark College idiay Vancouver, Washington. Kameng iti Little League Group dagiti annakda. Katekistada iti St. John Evangelist Church ti Vancouver. Maysa ti anakda, ni Zachary.

Balakad ni Tata Silvestre kadagiti agtutubo: "Mapan agbasa iti eskuela, gun-oden ti imbag nga ipaay ti panagbasa para iti naranraniag a masakbayan ken panagbiag. No awan ti adal, awan ti napintas a biag."

Kadagiti kapatadana kunana: "Makitipon kadagiti pada a nataengan, agpipinnadamag, agiinnistoria, agay-ayam iti baraha, sakura, ken checker. Agtalinaed a naragsak."

Kuna dagiti annakda: "Bigbigenmi ti kinapateg ti ayat ken pannuportada kadakami."

Nagdenna dagiti agasawa iti agarup 68 a tawen.