BERNARDO CARIAGA: "Uray ti Nataengan, Mariknana met ti Kinaagtutubo a Salun-at"

Bernardo Cariaga

ITI tawenna a nobenta tres, salun-at ti agtutubo ti marikna ni Bernardo Cariaga, maysa a sakada.

Nayanak ni Bernardo idi Agosto 28, 1913 idiay Badoc, Ilocos Norte.

Kadagidi a panawen, narigat ti panagbiag dagiti ag-Cariaga nga addaan iti lima nga annak a supsuportaran. Ni Bernardo ti inaudi kadakuada nga agkakabsat. Nangato ti arapaapna ti biag. Masansan a kitaenna nga umuna ti pagsayaatan ti pamiliana.

Iti tawenna a disisiete idi 1930, naikkan ti gundaway a mapan iti Estados Unidos babaen ti tulong ti Dios-ti-aluadna Mr. Felipe Gamponia. Naglugan ni Bernardo iti barko nga S.S. President Wilson a nagturong iti U.S. Ngem ti kinapudnona, ipakita iti papelesna nga agturong ti barko a nagluganna iti Mainland U.S. tapno sadiay ti pagtrabahuanna. 

Idi nagsardeng ti barko iti Honolulu, sinaludsod ti maysa a pahinante ti barko kenkuana no adda balonna a napuskol a bado nga usarenna no bilang makadanonda iti Mainland. Nasaludsod ti lalaki daytoy gapu ta nalamiis ti tiempo sadiay no panawen ti lam-ek.

Nagwingiwing ni Bernardo. Gapu ti dayta, kinasarita ti recruiting officer ni Bernardo tapno iti laengen Hawaii ti destino ken pagtrabahuanna. Nayat ni Bernardo. Kaduana ngarud da Felipe Gamponia ken Juan Valentin a nagturong iti Maui.

Ti Destino

Ket apaman a nakasangpetda iti Maui, naitarusda iti Pioneer Mill, Lahaina. Nagyanda iti maysa a plantation camp iti Waine'e Village, a maawagan pay iti "Lahaina Pump."

Napan sinabat da Andres ken Catalina Cariaga, agpada a kabagian ni Bernardo.

Nagtrabaho ni Bernardo iti irrigation system ken mabayadan daytoy ti $1.00 iti tunggal aldaw. Sabali laeng ti trabahon nga agputed ken agbagkat ti unas.

Kadagidi a panawen kuna ni Bernardo, no adda makasapul ti tulong, matulongan dayta a tao uray saan nga isu ti naited kenka a trabaho.

Dinayawna dagidi a panawen ta natalged ken awan kabuteng iti pagyananda a kampo. Awan mangibalunet kadagiti ridaw ti pagtaengan. Agtitinnulong ketdi ti tunggal maysa. Mayarigda a dakkel a pamilia iti uneg ti kampo. Agpipinnadawat ken agpipinnarabur: kas pagarigan, nateng a mulada, limu [seaweeds] a maala iti baybay, kdpy.

No adda agparti ti baboy, baka ken kalding, tumulong amin a karruba ket matangdananda. 

Idi, awan maibunong nga imbitasion no adda agpapunsion. Maawis tunggal maysa. Mapanda tumulong nga agisagana iti padaya.

"Naragsak tunggal maysa nga agindeg iti kampo," linagip ni Bernardo.

No marambakan ti Rizal Day, adda maangay a parada, ay-ayam ken pasala. Sabali pay ti Rizal Day Queen a marambakan. Maysa kadagiti kaunaan a napili a reyna ti daytoy a rambak ket ni Sally Entanal--nagbalin met a bayabayna [escort] ni Gonzalo Aga. Maysa a pagyaman ken pagdayaw ti Rizal Day Queen.

Tapno makaur-or iti pundo daytoy a selebrasion, maangay nga umuna ti social boxes, manzo ken ribbon dances. Daytoy a social box dance ket umasping iti lakuan ti di nadundon nga isalda. Ti kangatoan ti tawar isu ti mangyawid ti social box ken adda gundawayna a mangisala ti kandidata. Ti ribbon ken manzo dances ket gatangen dagiti lallaki ti tiket. No ad-adu ti tiket a gatangen, ad-adu met ti tiansa a sumala ken mangisala. No maiwaragawag ti kolor a mabunot iti tambiolo, dagiti adda kasta a kolor ti mabalin laeng a sumala. Sabali pay ti makuna a "ladies choice dance," dagiti babbai ti agpili ti kayatda nga isala a lalaki.

Ngem kadaydi a tawen 1930, naisayangkat ti panagwelga. Maysa ni Bernardo ti naikkat iti trabaho. Gapu ti daytoy, napan nagtrabaho iti kapinyaan nga awaganda pay ti "Baldwin Packers." Agpurosda ti pinya sada bagkaten nga ipan iparada iti kalsada a pangalaan ken pakailugananna iti trak.

Napudno ken nagaget ni Bernardo iti trabaho. Naidiaya pay kenkuana ti panagbalinna a permanente a superbisor [luna], ngem ti kina-temporario a superbisor laeng ti inawatna. Kaay-ayona pay a kasarsarita ken kadua dagiti estudiante no panawen ti tikag ta mariknana ti kinaagtutubo a salun-at.

Ti Edukasion

Paggaayat ni Bernardo ti kanayon nga agsursuro. Nagenrol iti math ken english subject iti Adult Education Program. Ni Mrs. Edith Matsushima iti Honokokua Elementary School ti maestra ken nagisuro kenkuana. Dinayaw ni Bernardo ti kinalaing ken kinapasnek ti panagisuro ti maestra.

"Adu ti nasursurok kenkuan," intangsit ni Bernardo.

Kinanunongan met ni Carmen Cariaga, balasang ni Bernardo, ti imbaga ti amana. Kuna ni Carmen nga alisto a nakasursuro ni Bernardo.

Aktibo iti Komunidad

Aktibo pay ni Bernardo iti Filipino Honolua Community Association ken iti Filipino Catholic Clubs.

Idi 1940's, maysa ni Bernardo a napili a Maui Volunteers, forerunner ti Hawaii National Guard a kaduana ni Mr. A.B. Sevilla, kdpy. Tumulong dagitoy iti pannakaipatungpal ti kinatalged iti komunidad.

Karaman pay ni Bernardo iti ILWU. Kaduana idi ti union organizers ken ahente kas kada Tadao Uchiyama, Charles Cabe ken Tom Yagi.

Ti Pamilia

Naparaburan da Bernardo ken ti Dios-ti-aluadna a kaingungotna, Lapaz "Lillian" Acoba, iti dua nga annak.

Ni Carmen, inauna ken nayasawa ken ni Catalino Garcia, Nagturpos daytoy iti Stegnography Institute of Hawaii ken nagtrabaho iti Lahaina Shores Resort, Guest Services Department. Naaddaanda ti tallo nga annak: Tina, Catalino, Jr., ken Trisha.

Benny Cariaga, maikadua. Nagturpos iti Lahainaluna High School ken Maui Community College, Major in Carpentry.

Kaay-ayo ni Bernardo a pangibusan ti orasna ti agmula iti hardinna, agatendar iti ay-ayam a bingo iti Lahaina Senior Group, Lahaina.

Balakadna kadagiti agtutubo: "Saan a makiapa, agbasa tapno magun-od ti nasayaat nga edukasion."

Kunana met kadagiti kapatadana: "Saluadan ti salun-at, agwatwat ken agan-anus."

Ammo a saluadan ni Bernardo ti bagina iti tawenna a nobenta tres, nataer a langa, diretso ti takder ken pannagna ken maawatan a panagsao. "Laglagipen, uray ti nataengan, mariknana met ti kinaagtutubo a salun-at," kunana.

*Pimmusayen ni Tata Bernardo.

BERNARDO CARIAGA: "Uray ti Nataengan, Mariknana met ti Kinaagtutubo a Salun-at"

Rudy Ram. Rumbaoa

Dagiti Koleksion a Daniw, Sarita, Kanta ken Dadduma Pay

wwwammuenpaydaytoysakada.blogspot.com

[cr]aydotcom

FAUSTINO L. TABIOS: Agyaman iti Maited nga Opurtunidad

[nabulod ti ladawan a naaramat]

Nupay ubing idi napan iti Hawaii, nagbalin ketdi a karit kenkuana dagiti pannubok a naglabasanna. Kanayonna a gutgutigoten ken papigsaen ti pakinakem dagiti annakna nga agbasa tapno maawatda ti napintas nga edukasion para ti masakbayanda.

NAYANAK ni Faustino L. Tabios idi Pebrero 15, 1922 iti San Nicolas, Ilocos Norte. 

Kas met la ti arapaap dagiti kaaduan a sakada, kayatna ti mapan iti Hawaii tapno sapulenna ti napimpintas ken naim-imbag a gasatna ken masakbayan ti pamiliana. Opurtunidad ti nangiduron ken ni Faustino idi simmangpet ni Uncle-na Lorenzo Baguio a naggapu iti Hawaii, tawen 1920 ken nagtrabaho daytoy iti Waialua Sugar Plantation. Pinetisionanna ni Faustino tapno mapan met agtrabaho idiay Hawaii. Saan a nagkitakit ket inawatna a dagus ti awis ken opurtunidad.


Nagluas ti grupo ni Faustino manipud iti pantalan ti Salomague, Cabugao, Ilocos Sur. Nagluganda iti barko nga S.S. Maunawili idi Pebrero 28, 1946. Iti tawenna a beinte kuatro, imbatina ti naub-ubing nga asawana, ni Monica, ken ti agtawen laeng iti dua nga anakna, ni Erlinda. Para ken ni Faustino, nasaem a panawan ti pamilia ngem masapul nga agsakripisio tapno mailung-awna ida iti rigat ti panagbiag.


Tapno makaulida iti barko nga S.S. Maunawili, inaramatda ti tali a nangkalay-at nga immuli iti barko imbes nga immulida iti mausar a rampa. 

Ti S.S. Maunawili ket maysa a barko a pangyallatiw kadagiti dingnguen ken saan a nairanta a pagluganan ti tao. Segun ken ni Faustino, nababa ti bobeda ti barko ken masagid ti ulo ti maysa a tao no agtakder.


Dagiti nakaluganan ni Faustino a padana a sakada a nagturong iti Hawaii isu da: Gervacio Delos Santos, Angel Pascua, Cresencio Bagay, Narciso Ulep, Mauro Simpliciano, Calixto Ulep, Melchor Baguio, Rizal Baguio, Fermin Baguio, Luis Baguio, Panfilo Sanchez, Teodoro Tabios ken Ricardo Damo.


Apaman a nakasangladda iti Port Allen ti Kauai idi Marso 14, 1946, nagtalinaedda sadiay iti maysa a rabii ket kalpasanna, nagtuloyda a naglayag a nagturong iti Honolulu, Oahu. 

Idi Marso 15, naibaon ni Faustino idiay Waialua Sugar Plantation. Nagtrabaho agingga a bimtak ti welga idi Nobiembre 1946.


Gapu ti welga, nagturong ni Faustino idiay Honolulu ket nagtrabho iti shipyard. Karaman iti trabahona ti agikkat ti railroad tracks tapno adda sindadaan a pagnaan ti bus, agdalus iti pakigubat a barko, kdpy. Ngem daksanggasat ta naikkat iti pagtrabahoanna iti Honolulu Shipyard idi 1948. Ngem saan a napukawan ti namnama ni Faustino.


Kalpasan a naikkat iti nagtrabahoanna, nagturong daytoy idiay Lanai ket nakastrek iti trabaho, iti Dole Pineapple Company. Nagtrabaho pay a kas grass cutter ken agpuros ti pinya agingga idi tawen 1950. Para ken ni Faustino, narigat a trabaho ti agpuros iti pinya ta maibilagda iti bara ti init nga agmalmalem. Ken maysa pay, mabayadan laeng iti 75 cents ti tunggal aldaw. Dina naanusan.


Idi 1951, nagturong ni Faustino iti Maui. Nagtrabaho iti Pioneer Mill ti Lahaina. Grass cutter ken irrigator ti trabaho daytoy agingga a nagretiro idi 1985.


Nagindeg ni Faustino iti Wainee Village [Lahaina Pump] karaman pay dagiti sabsabali pay a sakada. Iti nasao a purok, narigat ti biag ngem maipamuspusanda no kasano a mabirokan ti ragsak nangruna no maangay ti Rizal Day. 

Iti daytoy a pasken, adu dagiti naragsak nga aktibidad kas ti ay-ayam, pasala ken no ania dita a mangparag-o ti kinaliday gaput' pannakayadayo iti pamilia. Agpartida iti baboy para ti pasken. Ket gapu ti daytoy, nagbalin a paset ti aktibidad ti agparti ti baboy ta ditoy a makita ken marikna ti nairut a pannakipagayam. 

Segun ken ni Faustino, tunggal kampo iti Maui ti mangrambak ti Rizal Day isuna laeng ta di agpapada ti petsa ken aldaw.


Ginundawayan ni Faustino ti naurnongna nga oras ti trabaho ket nagbakasion iti napaut idiay Filipinas. 

Idi 1955, naglugan iti barko nga S.S. President Wilson tapno makayawid iti ad-adu a "pasarabo" para iti pamiliana. Inaramid manen ni Faustino ti nagawid idi 1961.


Maysa kadagiti di malipatan ken karagsakan a pasamak iti biag ni Faustino ket idi napasangpetna ti pamiliana iti Hawaii, tawen 1967 [linuktan ngamin ti imigrasion para kadagiti resident aliens a mangpetision ti kaasitgan a pamilia tapno makipagnaed iti Estados Unidos].


Immuna a simmangpet ti kaingungotna ni Monica, dagiti annakna da Florendo, Melandrino, ken Margarita idi tawen 1967 ken nagnaedda iti Wainee Village [Lahaina Pump] agingga a narugian a binangon ti Sugar Plantation [AMFAC] ti baro a subdibision nga agpaay kadagiti trabahadorda. 

Di mabayag, simmaruno a simmangpet ni Erlinda ken ti pamiliana. Kalpasan ti sumagmamano a bulan, gimmatang ni Faustino iti lote ken balayna iti Kelawea Mauka Subdivision idi 1972.


Malagip ken nagyaman ni Florendo, ti anak a lalaki ni Faustino da Mr. & Mrs. Nemesio Corpuz, Mr. & Mrs. Arsenio Jacinto ken Mr. & Mrs. Alfredo Baraoidan gapu ti adu a tulong dagitoy idi simmangpetda iti Hawaii.




Naparaburan da Monica ken Faustino Tabios iti uppat nga annak:

Ti inauna, ni Erlinda, nayasawa ken ni Elpidio Delos Santos ti Lahaina. Nagretiron iti Lahaina Shores a nagtrabahoanna. Tallo ti annakda ken ni Elpidio.


Ni Florendo Tabios, Jr. ti maikadua. Nayasawa ken ni Alma Echalas. Nagturpos ni Florendo iti Maui Community College ken nagpapaay iti County of Maui, Police Department. 


Ti maikatlo isu ni Melandrino Tabios, nayasawa ken ni Myrna Tabios. Nagturpos iti Maui Community College ken nagtrabaho iti Maui Marriot Engineering Department. Maysa ti anakda.


Ni Margarita ti inaudi, nayasawa ken ni Robert Nelson. Nagturpos iti University of Hawaii- Manoa ken nagtrabaho iti J.C. Penny idiay Tacoma, Washington a pagnaedanda.



Kuna ni Faustino kadagiti kapatadana: "Agyaman ta naikkanka ti opurtunidad nga umay iti Hawaii para ti napimpintas a panagbiag. No nagbati ken binay-am a nataenganka idiay Filipinas, awan ngata ti masagrap a napintas a benepisio kas iti retirement income, Social Security ken Medical benefits." 

Ti balakadna kadagiti agtutubo: "Agbalin a nasayaat, mapan agbasa, ta ti kaadda ti edukasion ti mangted kenka ti napimpintas a pagtrabahoan."



Miembro ni Faustino iti United Sons and Daughters of Ilocano Region [USDIR]. Kas paset ti panagensayo, kaay-ayona ti magna, gardening, agmula iti natnateng kas ti paria, tarong, sibuyas, kdpy. Magustoanna pay ti agbuya ti Filipino Channel ken agdengngeg ti Filipino program iti radio.


Agyamyaman unay ni Florendo iti amana gapu ti ayat, kinapudno ken pinansial a suportana iti pamiliana bayat ti kaaddada iti Filipinas ta dina binay-an ida idi nagturong iti Hawaii. Nupay ubing idi napan iti Hawaii, nagbalin ketdi a karit kenkuana dagiti pannubok a naglabasanna. Kanayonna a gutgutigoten ken papigsaen ti pakinakem dagiti annakna nga agbasa tapno maawatda ti napintas nga edukasion para ti masakbayanda.



FAUSTINO L. TABIOS: AGYAMAN ITI MAITED NGA OPURTUNIDAD
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwammuenpaydaytoysakada.blogspot.com

Ginundawayanna ti Opurtunidad a Simmangbay Kenkuana

[Nabulod ti ladawan a naaramat]

"Saan nga iti edad ti makatubeng tapno maragpat ti kayatmo. No dakkel ti pammatim, magun-odmo ti kalikagumam-- ken mariknam met ti kinaagtutubo a rikna.."



BERNARDO CARIAGA, maysa a Sakada.



Ngem Asino ni Bernardo Cariaga?
Nayanak ni Bernardo Cariaga idi Agosto 28, 1913 iti Badoc, Ilocos Norte.


Iti panawen ni Bernardo, narigat ti biag ti pamiia Cariaga. Ni Bernardo ti inaudi kadakuada a lima nga agkakabsat. Nupay marigrigat ti nagannak ni Bernardo, naipaayanda pay laeng dagiti annakda ti umno a pannuporta ken biag a nasaliwanwan.


Ngem nangato ti arapaap ni Bernardo. Kanayon ti pagsayaatan ti pamilia ti umuna nga ipangrunana.



Ti opurtunidad a simmangbay
Idi tawen 1930, iti edadna a disi-siete, simmangbay ti opurtunidad ken ni Bernardo a mapan iti Estados Unidos babaen ti tulong daydi Dios-ti-aluadna Felipe Gamponia. 

Nagluas ti S.S. President Wilson a barko a nagluganan ni Bernardo iti pantalan ti Salomague, Cabugao, Ilocos Sur.


Ipakita ti iggem a papeles ni Bernardo nga agturong ti barko a naglugananna idiay Mainland U.S. tapno sadiay nga agtrabaho. Ngem idi nagsardeng ti barko iti Honolulu, sinaludsod ti maysa kadagiti nangawis [rekruter] ken ni Bernardo no adda naitugotna a napuskol a bado nga usarenna nga agturong iti Mainland ta nalamiis ti tiempo sadiay no panawen ti lam-ek. Awan ti maisungbat ni Bernardo ta dina met namnamaen ti Mainland ti destinona. Ti ammo ni Bernardo idi, iti Hawaii ti pangiturongan dagiti nangawis kenkuana nga agtrabaho.


Gapu ti daytoy, kinasarita ti recruiting officer ni Bernardo nga iti laengen Hawaii ti pakaidestinuanna. Saan a nagkitakit ni Bernardo ti singasing ti rekruter.


Kadua ni Bernardo da Felipe Gamponia ken Juan Valentin a naidissaag iti Honolulu. Kalpasanna, nagturongda iti Maui.



Ti destinasion ken kampo
Apaman a nakasangpet ti grupo ni Bernardo iti Maui, nagtarusda iti Pioneer Mill ti Lahaina. Nagyanda iti maysa a plantation camp iti Waine'e Village-- nga awaganda pay daytoy ti "Lahaina Pump." Sinabat da Andres ken Catalina Cariaga, agpada a kabagian ni Bernardo.


Nagtrabaho ni Bernardo iti irrigation system ken mabayadan ti $1.00 iti tunggal aldaw. Sabali laeng ti trabahona nga agputed ti unas ken agbagkat kadagiti naputedputed met la nga unas. 

Kadagidi a panawen kuna ni Bernardo no adda makasapul ti tulong, mabalin a tulongan dayta a tao uray no saan nga isu ti naited a trabaho.


Dinayaw ketdi ni Bernardo dagidi a panawen ta awan ti pagamkanda wenno kabutengda iti uneg ti kampo- kunana a natalged a lugar, awan ti mangibalunet wenno mangiserra ti ridaw ti pagtaenganda. 

Kuna ni Bernardo nga agtitinnulong dagiti Filipino. Mayarig a "dakkel a pamilia" ti puli dagiti Filipino iti dayta a kampo. Agpipinnadawat ken agpipinnaraburda iti aniaman a kasapulan ti maysa. 

Kas pagarigan, pagraramananda dagiti naimula a nateng ken prutas, wenno ti "limu" [seaweed] nga alaenda iti baybay, ken dadduma pay a taraon. No adda agparti ti baboy, baka, kalding, tumulong ti amin nga adda iti kampo sadanto maikkan iti tangdanda a makipagparti.


Kadagidi immun-una a panawen iti kampo, no adda agpasken, maawsi ti amin a makidar-ay ken makipagragsak. Maysa pay, awan ti makuna idi nga imbitasion a maibunong wenno maited tapno maawis ti maysa a tao. Mapan ti amin nga agindeg iti kampo tapno tumulong iti agpasken ken ti pannakaisagana ti taraon. 

Kuna ni Bernardo a naragsak tunggal maysa nga adda iti kampo.


Maangay ti parada no marambakan ti Rizal Day. Kasta met nga adda paay-ayam ken pasala. Sabali pay ti Rizal Day Queen a marambakan. Malagip ni Sally Entanal ti kaunaan a reyna ti daytoy a parambak. Nagbalin a bayabay [escort] ni Sally ni Gonzalo Aga. Maysa a naisangsangayan nga aldaw para kadagiti Filipinos ti Rizal Day Queen.


Tapno makaur-or ti pundo ti daytoy a parambak, maangay nga umuna ti social dance boxes, manzo ken ribbon dances. Daytoy a social box ket umasping iti lakuan ti di nadundon nga isalda. Ti kangatuan a tawar isu makaala iti social box ken adda gundawayna  a mangisala iti kandidata.


Iti nasao a ribbon ken manzo dances, gatangen dagiti lallaki ti tiket. No ad-adu a tiket ti magatang, ad-adu ti tiansa a makasala. No maiwaragawag ti kolor a mapili, dagiti laeng addaan iti dayta a kolor ti mabalin nga agsala. 

Sabali laeng ti makuna a "ladies choice dance," ditoy nga agpili ti babai ti kayatna nga isala a lalaki.


Idi tawen 1930, naikkat ni Bernardo iti trabahona gapu ti welga a napasamak iti pagtrabahuanna. Gapu ti daytoy a pasamak, napan ni Bernardo nagtrabaho iti kapinyaan nga aw-awaganda pay iti "Baldwin Pickers." Agpurosda iti pinya sada bagkaten nga ipan iti kalsada a pangalaan ken pakailugananna iti trak.


Napudno ken nagaget ni Bernardo iti trabaho. Naidiaya pay kenkuana nga agbalin a permanente a superbisor [luna], ngem ti kina-temporario a superbisor laeng ti inawatna.



Ti edukasion
Kayat ni Bernardo ti kanayon a makasursuro. Nangala ngarud iti Math ken English a klase iti Adult Education Program babaen ti panangisuro ni Mrs. Edith Matsushima iti Honokohua Elementary School. Dinayaw ni Bernardo ti kinalaing, kinasayaat ken kinapasnek a panagisuro ti naso a maestra.


"Adu ti nasursurok kenkuana," intangsit ni Bernardo.


Pinasingkedan ni Carmen Cariaga, ti balasang ni Bernardo, ti kuna ni tatangna. Kuna ni Carmen nga alisto a nakasursuro ni tatangna nupay nalakayanen daytoy.



Aktibo iti komunidad
Nagbalin nga aktibo ni Bernardo iti Filipino Honolua Community Association [FHCA] ken iti Filipino Catholic Club [FCC].


Idi 1940's, maysa ni Bernardo kadagiti Maui Volunteers, forerunner ti Hawaii National Guard [HNG], ken kaduana ni Mr. A.B. Sevilla, kdpy. Tumulong ti HNG iti pannakaipatungpal ti kinalinak ken kinatalged iti komunidad. Kameng pay ni Bernardo iti ILWU. Kadua ni Bernardo ti unyon organizers ken pannakabagi kas kada Tadao Ushiyama, Charles Cabe ken Tom Yagi.



Ti pamilia
Nayasawa ni Bernardo ken ni Lapas "Lilian" Acoba. Dua ti annakda.


Ni Carmen Cariaga, inauna ken nayasawa ken ni Catalino Garcia. Nagturpos daytoy iti Stegnography Institute of Hawaii ken nagtrabaho iti Lahaina Shores Resort- iti Guest Services Department. Tallo ti annakda: da Tina, Catalino, Jr., ken Trisha.


Maikadua ni Benny Cariaga. Nagturpos iti Lahainaluna High School ken Maui Community College- Major in Carpentry. Nagtrabaho iti Maui Land and Pine, Honolua.


Kaay-ayo ni Bernardo ti agmula kadagiti nadumaduma a klase ti nateng iti hardinna. Mapan pay agay-ayam ti bingo iti Lahaina Senior Group, Lahaina.


Kuna ni Bernardo kadagiti agtutubo: "Saan a makiapa. Agadal a naimbag tapno magun-od ti nasayaat nga edukasion."


Kunana met kadagiti kapatadanna: "Saluadan ti salun-at. Agwatwat ken kanayon koma ti panaganus."


Ammo ni Bernardo a saluadan ti bagina, ti salun-atna. 

Kunana: "Saan nga iti edad ti makatubeng tapno maragpat ti kayatmo. No dakkel ti pammatim, magun-odmo ti kalikagumam- ken mariknam met ti kinaagtutubo a rikna."*



GINUNDAWAYANNA TI OPURTUNIDAD A SIMMNGBAY KENKUANA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwammuenpaydaytoysakada.blogspot.com