NAYANAK ni Albino Sambrano Prieto, Sr. idi Pebrero 10, 1910 iti Barrio Tamorong, San Nicolas, Ilocos Norte. Maysa ni Albino kadagiti naruay a Filipino a napan iti isla ti Hawaii idi 1930s, ken maysa daytoy kadagiti maawagan ti "old-timers" wenno, nagkauna a sakada a nakagteng iti isla ti paraiso a kunada. Ket kas met dagiti dadduma nga Ilocano, nangato ti arapaap ni Albino iti biag, situtured a nangtallikud ti ingungotenna a pamilia tapno maisaganaanna ida iti naranraniag a masakbayan.
Segun ken ni Maria, kasimpungalan ni Albino, immuna a nadanon ni lakayna ti Big Island of Hawaii idi 1930, bulan ti Enero. Nagtrabaho daytoy iti Sugar Plantation ken matangdanan ti maysa a doliar iti kada aldaw a panagbannogna iti kataltalonan.
Kanayon latta a nabasa ken natutudo ti paniempo iti Hilo. Gapu ti dayta, nagdesision ni Albino nga umakar iti isla ti Oahu tapno sadiay nga agtrabaho.
Idi tawen 1937, nagbaliw ti desision ni Albino ket immakar iti Haliimaile, iti isla ti Maui ket ditoy a nakastrek iti trabaho, iti Maui Pine Plantation. Nagtrabaho ditoy agingga a naturposna ti panagretirona idi 1972 a kas maysa a truck driver.
Kas maysa a batsilier wenno baro, nakipagnaed iti Dios-ti-aluadna a Sakada Maximo Pagurigan, ta mailasin dagiti batsilier kadagiti naasawan a lallaki iti dayta tiempo.
Nagdesision ni Albino a mapan agbakasion iti Filipinas idi 1953 tapno agsapul ti kapunganna. Ket iti kaunaan a gundaway iti panagbiag ken pannakariknana iti ayat, naam-ammona ti maysa a dayag a taga-Catuguing, San Nicolas, Ilocos Norte. Nakapimpintas daytoy a dayag para ken ni Albino. Nagam-ammoda ken ni Maria Coloma.
Iti kaduogan a pammati ken tradision dagiti Filipino, dagiti nataengan a mangibagi ti agsumbangir a partido ti mangurnos iti kasar. Nabayagen a naibaga ni Albino iti tatang ni Maria ken kabagianna ti natarnaw a tarigagay ken naimpapusoan a panagayatna iti balasang. Dinawat ni Albino ti pammalubos dagiti nagannakna nga ikasarna ni Maria.
Iti maysa nga aldaw a panagawd ni Maria a naggapu iti Bangui, Ilocos Norte, nakigtot laengen idi maammuanna a natulagen ti kasarda ken ni Albino. Naladawen idi agkedked ti balasang iti plano dagiti nagannakna. Ta para iti balasang, narigat nga awatenna ti kinapudno aglalo ket dakkel ti nagbaetan ti tawenda a sangapulo ket siam ken ni Albino.
Gapu ti napintas ken nabagas a pammagbaga ken pannuporta ti kabsatna a babai, naallukoy met laeng ti rikna ni Maria a mangawat iti panagayat ni Albino kenkuana. Ken gapu ta natulnog nga anak ni Maria, pinampanunotna a naimbag ti idiaya dagiti nagannakna a makiasawa ken ni Albino para met laeng iti naranraniag a masakbayanna.
Idi Marso 20, 1953, nagkasar da Albino ken Maria. Nagsubli met ni Albino iti Hawaii idi Abril 3, 1953.
Ket idi Pebrero 1958, napan dinanon ni Maria ni Albino iti Hawaii.
Nagbalin a namaris ti relasion da Albino ken Maria. Rimmegta ti ayat ken pammateg iti tunggal maysa. Gapuna a nagbalin met daytoy a dakkel nga impluensia ken pondasion iti panagdakkel ken itatanor dagiti annakda a nasirib.
Napagasatan dagiti agasawa iti tallo nga annak:
Isu da: Albino Prieto, Jr., inauna ken agtrabaho iti WSP Hawaii. Nayasawa ken ni Janet Garidan ken dua dagiti annakda. Da Jolyn ken Albin. Agnaed da Albino Junior iti Waipahu, Oahu.
Maikadua ni Dominga Abe. Agtrabaho iti Kaiser Medical Group ken nayasawa ken Eric Abe. Dua met a nalungpo nga ubbing a babbai ti annakda, da Elena ken Emi.
Ni Glen Prieto ti inaudi. Empleado iti Doctors Medical Center ti San Pablo, California. Nayasawa ken ni Jane Prieto ken dua a lallaki ti annakda. Da Benjamin ken Samuel.
Managasistir unay nga asawa ken ina ni Maria kadagiti annakda sakbay a nagtrabaho iti Maui Pine Company idi tawen 1966. Imbubos ni Maria ti amin a panawenna iti daytoy a pagobraan agingga a nagretiro ti trabaho kalpasan ti beinte singko a tawen.
Aktibo a miembro da Albino ken Maria iti St. Joseph Filipino Catholic Club ken iti Haiimaile Community Association.
Para kadagitoy nga agasawa, importante pay laeng ti edukasion. Gapuna nga impaayda amin a pannuporta ken pinansial a kasapulan dagiti annakda tapno magun-odda ti kangatuan nga adal a maipaay ti maysa a pagadalan.
Nagturpos amin a tallo nga annakda iti kolehio.
Ngem daksanggasat ta pimmusay ni Albino idi Mayo 5, 1993.
Kuna dagiti tallo nga annakda, "Simple, naasi ken managayat unay ni tatangmi. Manmano nga agunget. Saan a managreklamo ngem kanayon a sisasagana a tumulong iti amin a pagkasapulan ti siasino man.
Kasunganina, kinadisiplina ti yad-adal ni ina kadakami. Managangaw ketdi ni Tatang no kasta a malmaldaykami a sangapamilliaan.
Agpakpakatawa, ngem managpartuat kadagiti bambanag. Inyaramidannakami iti sinan-karro/kotse nga ay-ayammi. Agaramid iti furnitures ken balay dagiti tarakenmi. Isu pay ketdin a mismo ti nagaramid iti extension ti balaymi, ta kunana, isu pay a pangtangdanna iti agtrabaho. Wen, nainut ken managsalimetmet ni tatang. Saan la a dayta, insurona pay kadakami no kasano ti ag-garden kas iti panagmula, aglammua, ken agani wenno mangburas iti mula a mani ken patatas. Mismo met la a ni tatang ti nagisuro kadakami no kasano ti agluto iti "pinakbet" gapu ta iti dayta a tiempo, agtartrabaho pay la ni ina.
Kaay-ayo pay ni tatang ti mapan agbanniit iti Spreckelsville, Hookipa ken Naska [Kanaha Beach]. Ket no dadduma, itugotnakami sakamto aguray iti uneg ti karro bayat nga agbanniit. No dadduma, kakuyogna ni Isabelo Ordonez, maysa met la a sakada a mapan agpallailang iti igid ti baybay.
Dimi malipatan ti kinaburay ken kinadungngona kadakami nga agkakabsat nangruna no ikkannakami idi iti penny nga igatangmi ti kendi iti Inokuma Store. Sinuroannakam' pay nga agmaneho ti karro iti kalsada ti kapinyaan a kataltalonan ti Haliimaile kalpasan ti trabahona. Nagaget nga agtrabaho ta ayatna laeng a saankami a maawanan iti kasapulan, nangruna ti pinansial. Ket pudno unay, nagsakripisio a nagtrabaho ni tatang tapno makaadalkami nga agkakabsat iti kolehio."
"Impagunamgunam unay ni tatang kadakami ti kinaimportansia ti edukasion, ti kinadalus a kinatao, ti kinapudno iti amin nga aramid, ken ti panangtulong iti tunggal maysa. Ket uray pay idin nakapagretiro iti Maui Pine, agtultuloy pay laeng nga agtrabaho. Agawat ti lammuaenna a dalusan iti balay dagiti am-ammo ken gagayyemna. No dadduma, maisurotkami pay nga agkakaka iti sideline a trabahona," linagip ni Glen.
"Maysa a pagulidanan nga Ama ni tatang," innayon ni Albino Junior.
.
.
.
.
.
ALBINO SAMBRANO PRIETO, Sr.
Gapu't Nangato nga Arapaap daytoy San Nicolaneo, nadanonna ti Hawaii
Rudy Ram. Rumbaoa
wwwammuenpaydaytoysakada.blogspot.com
No comments:
Post a Comment